Монгол Улсын Засгийн Газрын үйл ажиллагааны хөтөлбөрт “Монгол өв ба дэлхий дахин” арга хэмжээ тусгагдаж соёлын өвийг гадаад улсаас эргүүлэн авч ирэх, хамтарч судлах, үзэсгэлэн гаргах зэрэг олон арга хэмжээг Монгол Улсын Соёл, спорт, аялал жуучлал, залуучуудын яамнаас үе шаттайгаар хэрэгжүүлж байна.

Монголоос гаралтай үлэг гүрвэлийн олдворуудыг эх орондоо татан авах ажиллагаа 2013 оноос эхлэсэн бөгөөд өнөөдрийн байдлаар 5 дахь удаагаа татан авалтаа хийгээд байна. Эх орондоо эргэн ирсэн болон Байгалийн түүхийн музейн сан хөмрөгт хадгалагдаж байгаа олдворуудаар 2024 оны 03 дугаар сард “WELCOME HOME” түр үзэсгэлэнг Орчин цагийн музей үүсэж хөгжсөний 100 жилийн ойд зориулан Байгалийн түүхийн музейн үзэсгэлэнгийн танхимд, “WELCOME HOME-2” түр үзэсгэлэнг 2024 оны 06 дугаар сард Хүүхэд, залуучуудын театрт дэглэж олны хүртээл болгосон бол энэ удаа Үлэг гүрвэлийн өлгий нутаг Өмнөговь аймгийн Говийн байгаль, түүхийн музейн үзэсгэлэнгийн танхимд дэглэн олон нийтэд үзүүлж эхлээд байна.

Үзэсгэлэнд Тарвозавр Батаар, Протоцератопс тэргүүтэй 4 төрлийн 11 ширхэг үлэг гүрвэлийн гавлын ясны олдворууд дэглэгдсэн.

Үзэсгэлэн 2024 оны 08 дугаар сарын 25-ны өдрөөс 09 дүгээр сарын 16-ны өдрийг дуустал дэглэгдэн олон нийтэд үйлчлэх тул Даланзадгад хотын иргэд болон тус хотод аялаж байгаа гадаад дотоодын жуулчид та бүхэн Говийн байгаль, түүхийн музейгээр зочлон багахан хугацаанд ертөнцийн түүхийн нэгэн цаг хугацаагаар аялахыг урьж байна.

Хамтран ажилласан:

Соёл, спорт, аялал жуулчлал, залуучуудын яам

Говийн байгаль, түүхийн музей