БАЙГАЛИЙН ТҮҮХИЙН МУЗЕЙ – ГАДААД ХАМТЫН АЖИЛЛАГАА
Байгалийн түүхийн музейн захирал, шинжлэх ухааны доктор (Sc.D) Н.Манчук болон холбогдох мэргэжилтнүүд, ХБНГУ-ын Гёрлиц хотын Зенкенбергийн Байгалийн түүхийн музейн захирал, Дрездений их сургуулийн профессор, доктор (Ph.D) Карстен Веше; ургамлын тэнхимийн эрхлэгч, профессор, доктор (Ph.D) Кристиана Ритц; судлаач, доктор (Ph.D) Х.Оюундэлгэр тэргүүтэй төлөөлөгчдийг хүлээн авч уулзлаа.
Уулзалтын үеэр талууд:
Шинэ бүтээн байгуулалтыг танилцуулан Байгалийн шинжлэх ухааны үндэсний музейн барилга байгууламж, үзүүллэг дэглэлтийн онцлогийн талаар санал солилцов. Эрдэм шинжилгээ, судалгааны олон талт ажил хэрэгжүүлэх, үзэсгэлэн хамтран зохион байгуулах боломжийг хэлэлцэн, Хамтын ажиллагаагаа өргөжүүлэн баталгаажуулах Санамж бичиг байгуулахаар тохиролцлоо.
Энэхүү хамтын ажиллагаа нь хоёр музейн эрдэм шинжилгээ, судалгаа, үзүүллэгийн арга зүй, олон улсын туршлага солилцоонд чухал ач холбогдолтой юм.
