Монгол Улсад орчин цагийн музей үүсч, хөгжсөний 97 жилийн ой болон Байгалийн түүхийн музейн 30 жил,  Монгол Улсын соёл урлагийн ажилтны 28 дахь өдрийг тохиолдуулан Байгалийн түүхийн музейн Үзмэр харгалзагч Н.Отгонжаргал салбартаа тэргүүлэн Соёлын тэргүүний ажилтан цол тэмдэгээр 2021 оны 09 дүгээр сарын 09-ний өдөр шагнууллаа. Шагнал гардуулах үеэр Соёлын сайд Ч.Номин хэлэхдээ, “Соёл, урлагийн салбарыг хөгжүүлэх их үйлсэд өөрийн авьяас билэг, оюун ухаан, хүч хөдөлмөрөө зориулж ирсэн эрхэм та бүхэнд энэ өдрийн мэндийг хүргэж, соёл, урлагийн салбарын нийт ажилтан, албан хаагчдын өмнөөс болон хувиасаа баяр хүргэе. Аливаа бүтээл нь уран бүтээлчдийн ертөнцийг үзэх үзэл санааг агуулах төдийгүй цаг үеийнхээ тусгал болон хожмоо энэ нь түүх болон үлддэг. Энэ цаг үеийн түүхийг бүтээж, түүчээлж манлайлж байгаа та бүхэндээ дахин баяр хүргэж, чин сэтгэлээсээ сайн сайхныг хүсье” гэлээ. Н.Отгонжаргал нь тус музейд 16 жил тогтвор суурьшилтай, хоёргүй сэтгэлээр ажилласан бөгөөд Байгалийн түүхийн музейд СТА дахин нэгээр нэмэгдэж байгаад хамт олон тань олзуурхан хүлээн авч ажлын өндөр амжилт, сайн сайхныг хүсье.