“Соёлын бүтээлч сар” аяны хүрээнд зохион байгуулж буй “МОНГОЛЫН ЭРТНИЙ ДАЛАЙН АМЬДРАЛ – ЭРДЭМТЭН, ПРОФЕССОР Ч.МИНЖИНГИЙН ПАЛЕОНТОЛОГИЙН ШИНЖЛЭХ УХААНД ОРУУЛСАН ХУВЬ НЭМЭР” тусгай үзэсгэлэн шинжлэх ухааны ажилтнуудын өдрөөр нээлтээ хийлээ.

Тус үзэсгэлэнд эрдэмтэн, профессор Ч.Минжиний амьдралын 48 жилийн палеонтологийн шинжлэх ухаанд оруулсан хувь нэмэр болон эртний далайн амьдралыг судалсан судалгааг энэхүү түр үзэсгэлэнгээр толилууллаа. Үүнд: өөрийн хэрэглэж байсан дуран гэх мэт 13 эд хэрэглэл, гар бичмэл болох хээрийн тэмдэглэл, эртний далайн амьтдын 30 гаруй олдвор болон шинжлэх ухааны танин мэдэхүйн танилцуулгуудыг дэглэж эрдэмтэн судлаачид, оюутан сурагчид болон үзэгчдийн хүртээл болголоо. Мөн үзэсгэлэнгийн нээлтийн үеэр эрдэмтний шавь нар нь дурсамж, түүх, судалгааны бүтээлийн тухай сонирхолтой илтгэлүүд сонордууллаа.

Тус үзэсгэлэн 12 дугаар сарын 15-ны өдрийг хүртэл үргэлжилнэ.