Монгол Улс АНУ-ын Засгийн газар хоорондын хамтын ажиллагааны хүрээнд АНУ-д хууль бусаар хил дамнуулан худалдагдсан Монголоос гаралтай үлэг гүрвэлийн олдворуудыг эх орондоо татан авах ажиллагаа 2013 оноос эхэлсэн бөгөөд өнөөдрийн байдлаар 5 дахь удаагаа татан авалтаа хийгээд байна. Эх орондоо эргэн ирсэн олдворуудаар 2024 оны 03 дугаар сард “WELCOME HOME” түр үзэсгэлэнг Орчин цагийн музей үүсэж хөгжсөний 100 жилийн ойд зориулан Байгалийн түүхийн музейн үзэсгэлэнгийн танхимд дэглэж олны хүртээл болгосон бол энэ удаа “Эх үрсийн эрхийг хамгаалах өдөр”-т зориулан Хүүхэд залуучуудын театрын үзэсгэлэнгийн танхимд дэглэн олон нийтэд хүргэхэд бэлэн болоод байна.

Үзэсгэлэнд Тарбозавр Батаар, Овираптор, Галлимимус, Протоцератопс зэрэг 8 төрлийн 15 ширхэг үлэг гүрвэлийн гавлын ясны олдворууд дэглэгдэнэ.

Үзэсгэлэн 2024 оны 05 дугаар сарын 29-ний өдрөөс 06 дугаар сарын 01-ний өдрийг дуустал дэглэгдэн нийтэд үнэ төлбөргүй үйлчлэх тул та бүхэн өргөнөөр ирж сонирхон багахан хугацаанд ертөнцийн түүхийн нэгэн цаг хугацаагаар аялахыг урьж байна.