Холбооны Бүгд Найрамдах Герман Улсын Горлиц хотын Зенкенбергийн Байгалийн түүхийн музейн урилгаар Байгалийн түүхийн музейн захирал, доктор И.Будбаяр, эрдэм шинжилгээний ажилтан Г.Цэцэгбадам нар 2025 оны 03 дугаар сарын 09-20-ны өдрүүдэд ХНБГУ-д ажиллав. Тэд Франкфурт хотын Зенкенбергийн судалгааны хүрээлэн, Горлиц хотын Зенкенбергийн Байгалийн түүхийн музей, Штутгарт хотын музей, Берлин хотын Байгалийн түүхийн музейд албан ёсны ажил хэрэгч айлчлал хийн захирлууд, холбогдох мэргэжилтнүүдтэй уулзав. Уулзалтын үеэр барилга байгууламж, түүний бүтэц зохион байгуулалт, үзүүллэг дэглэлтийн туршлага судалсан ба цаашид эрдэм шинжилгээ, сургалт судалгаа, түр үзэсгэлэн зохион байгуулах, мөн түүнчлэн шинээр ашиглалтад орох музейн үзүүллэг, үзэсгэлэнгийн хэсэг дээр хамтрах тухай санал солилцов. Мөн Монгол Улсаас ХБНГУ-д суугаа Элчин сайд, доктор Б.Мандахбилэгтэй уулзсан ба тэрээр хоёр талын хамтын ажиллагаанд дэмжлэг үзүүлэхээ илэрхийлсэн үр дүнтэй айлчлал болов.