Үлэг гүрвэлийн олдворыг хүлээн авч буй нь хоёр улсын холбогдох байгууллагууд мэргэжлийн өндөр түвшинд хамтран ажиллаж чадаж байгаагийн илрэл бөгөөд соёлын салбарын харилцаа, хамтын ажиллагааг бэхжүүлэх, түүнчлэн эдгээр олдворыг дахин хууль бусаар малтаж, борлуулахаас урьдчилан сэргийлэх чухал ач холбогдолтой үйл явдал болж байгаа билээ. 5 удаагийн таталтаар хүлээн авсан үлэг гүрвэлийн олдворуудаас сорчлон олон нийтэд түгээн сурталчлах зорилгоор Монгол Улсад орчин цагийн музей үүсэж хөгжсөний 100 жилийн ойг тэмдэглэн өнгөрүүлэх хүрээнд “WELCOME HOME” тусгай үзэсгэлэн Соёлын яамны дэмжлэгтэйгээр өнөөдөр Байгалийн түүхийн музейд нээлтээ хийлээ.
Монгол Улсын Засгийн газрын гишүүн Соёлын сайд Ч.Номин үзэсгэлэнг нээж үг хэллээ. Үзэсгэлэнд АНУ-ын Элчин сайдын яамны Олон нийттэй харилцах албаны дарга Жон С.Браун, Соёлын яамны харъяа байгууллагуудын төлөөлөл Соёлын өвийн үндэсний Төвийн захирал Г.Энхбат, Шинжлэх ухааны академийн Палеонтологийн хүрээлэнгийн Эртний амьтан ургамлын сан хөмрөгийн салбарын эрхлэгч С.Өлзийцэрэн, Шинжлэх ухааны академийн Палеонтологийн хүрээлэнгийн Палео, зоологийн салбарын эрхлэгч Б.Майнбаяр, Японы Окаяама Шинжлэх ухааны их сургуулийн Динозавр судлалын музейн захирал доктор (Ph.D) Шинобу Ишикаги, судлаач доктор (Ph.D) Кэнтаро Чиба болон бусад хамтрагч байгууллагын төлөөлөл оролцлоо.
Үзэсгэлэнгийн нээлтийн үеэр “Бяцхан палеонтологич” боловсролын хөтөлбөр хэрэгжлээ.
Үзэсгэлэн 03 дугаар сарын 9-17-ний өдрүүдэд үргэлжилнэ.