ЖАЙКА Японы Олон Улсын Хамтын Ажиллагааны Байгууллага, Японы Оосака хотын Үндэсний угсаатны зүйн музейтэй хамтран (MINPAKU) зохион байгуулдаг Японы Засгийн газрын тэтгэлэгт хөтөлбөр болох “Музей ба олон нийтийг хөгжүүлэх нь” сургалтад Монгол улсаас Байгалийн түүхийн музейн олон нийттэй харилцах ажилтан Г.Батзаяа 2024 оны 10 дугаар сарын 04-ний өдрөөс 12 дугаар сарын 18-ны өдийг хүртэлх хугацаанд амжилттай хамрагдаад ирлээ.
1994 оноос хойш “Музей судлалын гүнзгийрүүлсэн сургалт” нэртэйгээр зохион байгуулагдаж байгаа бөгөөд дэлхийн 65 орны 300 гаруй мэргэжилтнийг музейн чиглэлээр мэргэшүүлсэн ба Монгол Улсаас музей, соёлын өвийн 11 ажилтан хамрагдсан нь өдгөө эзэмшсэн мэдлэг, туршлагаа салбарынхаа хөгжилд зориулсаар яваа билээ. Байгалийн түүхийн музейгээс 2010 онд нэг ажилтан хамрагдсан бол энэ удаа Г.Батзаяа амжилттай суралцаад мэргэжил дээшлүүлээд ирлээ.
Тус сургалт нь музейн менежмент, маркетинг, сан хөмрөг, хадгалалт хамгаалалт, боловсролын хөтөлбөр, музейн үйл ажиллагаанд иргэдийг оролцуулах, сайн дурын хөтөлбөр, музейн үзүүллэг дэглэлтийн төлөвлөгөө, музейн үйлчилгээний хүртээмжтэй байдал зэрэг музейн үйл ажиллагаатай холбоотой олон сэдвээр онолын мэдлэг олгож, бодит байдалд хэрхэн хэрэгжүүлэх талаар мэдээлэл олгосон эрчимжүүлсэн сургалт юм.
