Н.Манчук нь Шинжлэх ухааны доктор (Sc.D), геологич, палеонтологич мэргэжилтэй.

Радиоляр, аммонит, эртний чулуун зэвсэг доторх микроамьтны үлдэгдлийн судалгаа, эртний амьтны үлдэгдлээр биостратиграфи хийх, изотопийн нас тогтоох, палео орчныг сэргээх чиглэлээр судалгааны гол ажлуудыг хийсэн.

Монгол болон Япон улс дахь музейн судалгаа, үзэсгэлэнгийн бэлтгэл, олон улсын хамтын ажиллагаанд 20 гаруй жил идэвхтэй оролцсон. ШУТИС, Нагояа их сургуультай хамтарсан төслүүдийг удирдаж, шинжлэх ухааны менежмент, хээрийн судалгаа, музейн боловсролын хөтөлбөр хэрэгжүүлж ирсэн. Музейн захиргааны ажилд шаардлагатай төлөвлөлт, удирдлага, олон нийтийн оролцоо, эрдэм шинжилгээний үйл ажиллагааг уялдуулан хөгжүүлэх ур чадвартай. Монгол, Япон, Англи, Казак хэлний ахисан түвшний мэдлэгтэй, 30 гаруй олон улсын түвшний судалгааны нийтлэл, бүтээл хэвлүүлсэн.

Япон улсын Нагояа их сургуулийн музей болон Йордан улсын Йорданы их сургуультай хамтарсан Йорданы эртний чулуун зэвсгийн судалгааны судлаач, Нагояа их сургуулийн болон музейн зочин судлаач, Япон улсын Нагояа их сургуулийн музей болон Сири улстай хамтарсан эртний чулуун зэвсгийн судалгааны судлаачаар оролцож байсан.

Монголын стратиграфийн комиссын нарийн бичгийн дарга (2024–одоо), Монгол Улсын Зөвлөх Геологи (2022–), Японы болон олон улсын радиоляр судлаачийн гишүүнээр (2009–) ажиллаж байгаа шинжлэх ухааны салбарын мэргэжилтэн Байгалийн түүхийн музейн захирлын үүргийг түр орлон гүйцэтгэгчээр томилогдлоо.