Бүгд Найрамдах улсаа тунхаглан зарлаж, анхдугаар Үндсэн хуулиа баталсан бахархалт түүхэн 101 жилийн ойн баярын мэнд хүргэе.
Энэ өдөр бол тэмцэл ялалт, төрт ёсны түүхэн их уламжлалтай манай ард түмний тусгаар тогтнол, эрх чөлөөгөө үеийн үед батлан сахиж, дархлан хамгаалж ирсэн үйл хэргээ үл мартан, үргэлж санахын баталгаа юм.
Модун Шаньюйгаас эхтэй монгол төрийн уламжлал хэзээ ч үл балран XX зууныг хүргэхдээ бид хоёр ч удаа тусгаар тогтнолоо зарлаж, улсаа тунхагласан байдаг. 1206 онд эзэн Чингис хаан Их Монгол Улсыг анх үндэслэн байгуулж, үүнээс 700 жилийн дараа 1911 онд Богд Жавзандамба тэргүүтэн Монголын эх орончид туурга тусгаар Монгол Улсаа сэргээн мандуулж, улсаа тунхаглаж байсан.
XX зууны Монголын түүх бол тусгаар тогтнолоо олж авах, хүлээн зөвшөөрүүлэх, баталгаажуулахын төлөөх их тэмцлийн түүх байсныг бид мартах учиргүй. Энэ тэмцлийн өрнөл дунд Монгол Улс Бүгд Найрамдах засагтай болсныг 1924 оны арваннэгдүгээр сарын 26-ны өдрийн 16 цаг 17 минутад Улсын Анхдугаар Их Хурлын 14-р тогтоолын I зүйлд батлан баталгаажуулан зарласан билээ.
Монгол Улс анх удаа ард түмэн өөрсдийн сонгож байгуулсан төлөөллийн парламентын тогтолцоонд шилжиж, улмаар 1940, 1960, 1992 онуудад Үндсэн хуульдаа засаглалын хэлбэр, агуулгыг баяжуулан шинэчлэх замаар улсынхаа тусгаар тогтнол, бүрэн эрхт байдлыг үе дамжин дархлан бэхжүүлж ирсний бахархалт эх үндэс болж өгсөн юм.
